بھیجے گئے فتوے تلاش کریں۔

الأربعاء 27 مايو 2026 / الأربعاء 10 - ذو القعدة - 1447 هـ

زیر سرپرستی:فضیلة الشيخ ڈاکٹر/ وصی اللہ بن محمد عباس حفظه الله (مدرس مسجد حرام، مکہ مکرمہ)

آپ کا سوال۔

بھیجے گئے فتوے تلاش کریں۔

دودھ پلانے یا حالت حمل سے گزرنے والی عورت کے صوم رمضان کے بارے میں شریعت اسلامیہ کا کیا حکم ہے-

فتویٰ نمبر۔:

تاریخ اشاعت: 12 مئی 2024

نظاروں کی تعداد: 1175

سوال

دودھ پلانے یا حالت حمل سے گزرنے والی عورت کے صوم رمضان کے بارے میں شریعت اسلامیہ کا کیا حکم ہے؟ کیا ہر صوم کے بدلے بطور فدیہ صرف کھانا کھلانا ان کے لئے کافی ہوگا۔؟

جواب

صوم رمضان (رمضان کا روزہ) ایک اہم عبادت اور ارکان اسلام میں سے ایک عظیم رکن ہے جو ہر بالغ عاقل مرد و عورت مسلمان پر فرض ہے، البتہ مریض،مسافر کیلئے رخصت ہے کہ وہ بعد میں قضا کر لیں گے۔ اسی طرح وہ عورتیں جو حمل یا رضاعت سے گزر رہی ہوں اور اپنے یا بچوں کے سلسلے میں کسی طرح کے ضرر و نقصان کا خدشہ رکھتی ہوں تو اس سلسلے میں صحابہ کرام و فقہاء عظام کا متفق علیہ مسئلہ ہے کہ وہ روزہ نہ رکھیں۔ آیا پھر بعد میں وہ کیا کریں؟۔۔ تو اس بابت علماء کے اقوال و دلائل کا خلاصہ یہی نکلتا ہے کہ حاملہ و مرضعہ فدیہ پر اکتفا کر سکتی ییں، نیز حدیث سے قضا کا بھی ثبوت ملتا ہے اس لیے دونوں میں سے کسی ایک کا بھی اختیار اُنھیں حاصل ہے۔ فدیہ دیں، یا روزے رکھیں ۔ یہی موقف قوی اور درست معلوم ہوتا ہے۔

اور حکمت کا تقاضہ بھی یہی ہے کیوں کہ ایک عورت جب رشتہ ازدواج سے منسلک ہوتی ہے تو کئی سالوں تک اسے دو مرحلوں(حمل و رضاعت) سے چھٹکارا نہیں ملتا اب اگر دس بیس برس بعد ان جمع شدہ روزوں کی قضا کرنا چاہے تو’تکلیف ما لا یطاق’ کی قبیل سے ہو جائے گا۔

اب رہا سوال ان دو حالتوں سے گزرنے والی عورتوں پر بعد میں کیا واجب ہوتا ہے۔۔؟؟

اس سلسلے میں علماء کے مابین شدید اختلاف ہے۔ ذیل میں مشہور و معروف تین اقوال ذکر کیے جا رہے ہیں۔

پہلا قول: ان پر صرف فدیہ ہے،قضا نہیں، ہر دن کے بدلے ایک مسکین کو کھانا کھلا دینے سے وہ برئ الذمہ ہو جائیں گی۔

اس کے قائلین ابن عمر اور ابن عباس،سعید بن جبیر اور سعید بن مسیب،قتادہ،عکرمہ، ابراہیم نخعی،امام مالک، نواب صدیق حسن خان بھوپالی اور علامہ البانی و غیرہم ہیں۔ [(المغني لابن قدامة:3/150،المحلى لابن حزم:4/411،412، فتح البيان في مقاصدالقرآن: 1/365،سلسلة الهدى والنور للالباني: 058)]

دلائل:

1- اللہ تعالیٰ کا فرمان ہے:"وعلى الذين يطيقونه فِديةٌ طعامُ مسكينٍ”. (البقرۃ :184)

اس آیت کی تفیسر میں حاملہ و مرضعہ کو بھی داخل(غیر منسوخ) مانا گیا ہے(سنن ابی داؤد:2317)

2- عبداللہ بن عباس رضی اللہ عنہ فرماتے ہیں: (بوڑھے مرد و عورت کو طاقت رکھنے کی صورت میں یہ رخصت دی گئی کہ چاہیں تو فدیہ دیں،چاہیں تو روزہ رکھیں،پھر یہ حکم آیت کریمہ"فَمَن شَهِدَ مِنكُمُ ٱلشَّهْرَ فَلْيَصُمْهُ وَمَن كَانَ مَرِيضًا أَوْ عَلَىٰ سَفَرٍۢ فَعِدَّةٌ مِّنْ أَيَّامٍ أُخرَ” سے منسوخ کردیا گیا، اور صرف بوڑھے مرد و عورت جب طاقت نہ رکھیں ان کے بارے میں ثابت رکھا کہ وہ کھانا کھلا دیں۔ اسی طرح حاملہ و مرضعہ کو جب خوف ہو تو ان کے بارے میں بھی ثابت رکھا کہ ہر دن کے بدلے ایک مسکین کو کھانا کھلا دیں۔ اور ان دونوں پر اس کی قضا نہیں۔) [(تفیسر ابن ابی حاتم:1/307،بإسناد حسن)]

دوسرا قول: حاملہ و مرضعہ دونوں پر صرف قضا ہے،فدیہ نہیں۔

یہ عطاء،حسن بصری،سعید بن جبیر،اوزاعی،ثوری،ابن المنذر امام ابو حنیفہ،علامہ عبدالرحمن مبارکپوری اور علامہ عبیداللہ مبارکپوری وغیرہم کا قول ہے۔ [(المحلی:4/441، والمغنی:3/150، تحفة الأحوذي:3/331)]

دلائل:

1- اللہ تعالی کا ارشاد ہے:"فَمَن كَانَ مِنكُم مَّرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ” [البقرة:184]

استدلال: آیت میں مریض کیلئے قضا کی صراحت ہے، اور حاملہ و مرضعہ مریض کی طرح ہیں، دونوں کے درمیان وجہ شبہ عارضی مشقت اور ضرر ہے۔لہذا جس طرح مریض پر عذر زائل ہونے کے بعد قضا ضروری ہے اسی طرح ان پر بھی ضروری ہے۔

2- سنن ترمذی میں موجود حضرت انس رضی اللہ عنہ کی وہ روایت جس میں نبیؐ نے فرمایا:((إنَّ اللهَ تبارك وتعالى و ضع عن المسافر……..وعن الحامِلِ والمُرضِعِ الصَّومَ- أو الصِّيامَ))[الترمذي، كتاب الصيام،715)

استدلال: دلالت اقتران ہے،کہ نبیؐ نے مسافر کے ساتھ حاملہ و مرضعہ کا تذکرہ کیا، اور دونوں کو ایک ہی سیاق میں جمع کر دیا، تو گویا دونوں کا حکم ایک ہی جیسا ہوگیا۔ یعنی مسافر پر بعد میں قضا ہی ہے تو حاملہ و مرضعہ بھی قضا کریں گی۔

تیسرا قول: قضا اور فدیہ اور دونوں واجب ہیں۔

یہ قول مجاہد،امام شافعی اور امام احمد کا ہے۔ [(المغني:3/150،)]

اس قول کے قائلین قضا کیلئے مریض پر قیاس کرتے ہیں، اور فدیہ کیلئے آیت کریمہ”وعلى الذين يطيقونه…..” کو بطور حجت پیش کرتے ہیں۔

[(مستفاد از:https://thefreelancer.co.in/?p=6622، دکتور فاروق عبداللہ النراینفوری)]

خلاصہ کلام یہ کہ حاملہ و مرضعہ کے روزے کے سلسلے میں شدید اختلاف رہا ہے۔ دلائل کے اعتبار سے پہلا قول (ہر صوم کے بدلے صرف فدیہ پر اکتفا کرنا) ہی زیادہ راجح اور اقرب الی الصواب معلوم ہوتا ہے۔

مضمون کا اشتراک کریں

متعلقہ فتوے

انقطاع حیض سے کیا خاتون پاک شمار ہوگى؟

العقیدة ورد الشبھات

غیر مسلم استاد کو سلام کرنے کا حکم

العقیدة ورد الشبھات

انجینئرنگ اور میڈیکل وغیرہ کے مسکین طالب علم کو اس کی تعلیمی فیس وغیرہ کیلئے زکوۃ دینے کا کیا ہے؟؟

العقیدة ورد الشبھات

غیر مسلموں کے تہواروں میں شرکت اور ان کے تحائف

العقیدة ورد الشبھات