بھیجے گئے فتوے تلاش کریں۔

الثلاثاء 27 يناير 2026 / 08 - شعبان-1447 هـ

زیر سرپرستی:فضیلة الشيخ ڈاکٹر/ وصی اللہ بن محمد عباس حفظه الله (مدرس مسجد حرام، مکہ مکرمہ)

آپ کا سوال۔

بھیجے گئے فتوے تلاش کریں۔

بعض بیٹے اور بیٹیوں کو وراثت سے محروم کرنے کا حکم

فتویٰ نمبر۔:

تاریخ اشاعت: 12 مئی 2024

نظاروں کی تعداد: 622

سوال

ہندوستانی آئین کے مطابق مرنے والے کو وصیت رکھنے کا اختیار ہے لہذا باپ اپنے بیٹے اور بیٹیوں میں سے جسے چاہے وراثت میں حصہ دے اور جسے چاہے منع کر سکتا ہے، تو اس سلسلے میں وصیت کا کیا حکم ہے؟

جواب

یہ بات معلوم ہونی چاہئے کہ اموال کو خاص کر ترکہ کے مال کو تقسیم کرنے کی ذمہ داری خود اللہ تعالٰی نے لے رکھی ہے لہذا اللہ تعالٰی نے ہر ایک کے حق کو واضح طور پر بیان کر دیا ہے اب اس میں اجتھاد کی کوئی گنجائش نہیں ہے بلکہ اس کے حکم کے آگے سر تسلیم خم کرنا واجب ہے ، اللہ کا فرمان ہے: ﴿ وَمَا كَانَ لِمُؤۡمِن وَلَا مُؤۡمِنَةٍ إِذَا قَضَى ٱللَّهُ وَرَسُولُهُۥ أَمۡرًا أَن يَكُونَ ‌لَهُمُ ‌ٱلۡخِيَرَةُ مِنۡ أَمۡرِهِمۡۗ ﴾[سورہ احزاب: آیت نمبر(36)] اور (دیکھو) کسی مومن مرد و عورت کو اللہ اور اس کے رسول کے فیصلہ کے بعد کسی امر کا کا کوئی اختیار باقی نہیں رہتا۔

اسی طرح میت کی اولاد میں سے ہر ایک اپنے باپ کے ترکہ میں اپنا حق رکھتا ہے، اللہ کا فرمان ہے: ﴿يُوصِيكُمُ اللهُ فِي أَوْلاَدِكُمْ لِلذَّكَرِ مِثْلُ حَظِّ الأُنْثَيَيْنِ﴾ [سورہ نساء: آیت نمبر(11)] اللہ تعالیٰ تمہیں اولاد کے بارے میں حکم کرتا ہے کہ ایک لڑکے کا حصہ دو لڑکیوں کے برابر ہے۔

اس لئے میت کا اپنی بعض اولاد کے لئے وصیت کو خاص کرنا اور بعض کو محروم کرنا ایک باطل امر ہے کیونکہ یہ چیز اللہ کے حکم کے اور نبی صلی اللہ علیہ وسلم کی اس حدیث کے مخالف ہے : «إِنَّ اللهَ قَدْ أَعْطَى كُلَّ ذِي حَقٍّ حَقَّهُ فَلاَ وَصِيَّةَ لِوَارِثٍ» بلاشبہ اللہ تعالیٰ نے ہر حقدار کو اس کا حق دے دیا ہے ، پس وارث کے لیے کوئی وصیت نہیں ۔[سنن ابو داود: حدیث نمبر(2870) ، سنن ترمذی: حدیث نمبر(2120) ، علامہ البانی نے ارواء الغلیل (1655) میں اسے صحیح کہا ہے]

شیخ الحدیث مبارکپوری رحمہ اللہ فرماتے ہیں کہ اولاد میں سے اگر کوئی نالائق وسرکش ، عاق ونافرمان ہے ، تو اس کو کچھ نہ دینا یا ایسے یعنی باپ کا مختلف حیلوں سے جائداد منقولہ وغیرہ منقولہ فرماں بردار اولاد کی طرف سے اس طرح منتقل کر دینا کہ عاق نہ باپ کی زندگی میں کچھ پائے اور نہ وفات کے بعد بطور میراث کے پا سکے ناجائز و نادرست ہے ، کسی اولاد کو دینا اور کسی کو نہ دینا حدیث مذکورہ بالا کے خلاف ہے ، اور ترکہ و میراث سے محروم کردینا یا محروم کرنے کی کوشش کرنا جاہلی طریقہ ہے ، جسے اسلام نے ناجائز و باطل قرار دیا ہے ارشاد ہے: (لِّلرِّجَالِ نَصِيبٌ مِّمَّا تَرَكَ الْوَالِدَانِ وَالْأَقْرَبُونَ وَلِلنِّسَاءِ نَصِيبٌ مِّمَّا تَرَكَ الْوَالِدَانِ وَالْأَقْرَبُونَ مِمَّا قَلَّ مِنْهُ أَوْ كَثُرَ ۚ نَصِيبًا مَّفْرُوضًا) [سورہ نساء: آیت نمبر(7)] ماں باپ اور خویش و اقارب کے ترکہ میں مردوں کا حصہ بھی ہے اور عورتوں کا بھی (جو مال ماں باپ اور خویش و اقارب چھوڑ کر مریں) خواہ وہ مال کم ہو یا زیادہ (اس میں) حصہ مقرر کیا ہوا ہے۔

اور اس سے زیادہ باطل امر یہ ہے کہ ان غیر اسلامی قوانین کا سہارا لیا جائے، کیونکہ یہ چیز غیر اللہ کو حاکم ماننے کے مترادف ہے، اور شریعت کے مخالف کسی قانون کی کوئی حیثیت نہیں ہے اور اس سے فیصلے کروانا جائز نہیں ہے، لہذا اہل علم پر واجب ہے اس سلسلے میں مسلمانوں کو شریعت کے احکام سے آگاہ کریں۔

واللہ اعلم

جواب از:

علمی کمیٹی

مضمون کا اشتراک کریں

فقه المعاملات

زکات کو منتقل کرنے کا حکم

فقه المعاملات