السبت 16 أغسطس 2025 / 22 من صفر-1447 هـ

زیر سرپرستی:فضیلة الشيخ ڈاکٹر/ وصی اللہ بن محمد عباس حفظه الله (مدرس مسجد حرام، مکہ مکرمہ)

کرسى پر نماز ادا کرنے کا شرعى حکم کیا ہے ؟

تاریخ اشاعت: 12 اگست 2025

نظاروں کی تعداد۔: 15

سوال

تجربہ

کرسى پر نماز ادا کرنے کا شرعى حکم کیا ہے ؟

جواب

تجربہ

الحمد للہ والصلاۃ والسلام علی رسول اللہ وآلہ وصحبہ ومن والاہ۔ أما بعد:

کھڑھے ہونے سے معذور شخص کے لئے کرسى پر نماز ادا کرنا جائز ہے۔ البتہ اس سے متعلق چند باتوں کا خاص خیال رکھنا ضرورى ہے۔

کھڑے ہوکر نماز ادا کرنا (قیام) نماز كا اہم رکن ہے۔ اللہ تعالى کا ارشاد ہے: ﵟٰ وَقُومُواْ لِلَّهِ قَٰنِتِينَ ٢٣٨ﵞ ﵝالبَقَرَةِ : ﵘﵓﵒﵜ اور اللہ تعالى كے لئے با ادب كھڑے رہا كرو۔

یہ آیت توجہ دلاتى ہے کہ کھڑے ہوکرنماز دا کرنا واجب ہے۔ اور یہى شرعى طریقہ ہے۔

جو شخص بیماری یا بڑھاپے کی وجہ سےکھڑے ہوکر نماز ادا کرنےسے عاجز ہو، تو اسے زمین پر یا کرسی پر بیٹھ کر نماز پڑھنے کی اجازت ہے۔ حضرت عمران بن حصین رضى اللہ عنہ سے روایت ہے کہ:

«كَانَتْ بِي بَوَاسِيرُ، فَسَأَلْتُ النَّبِيَّ r عَنِ الصَّلَاةِ، فَقَالَ: صَلِّ قَائِمًا، فَإِنْ ‌لَمْ ‌تَسْتَطِعْ فَقَاعِدًا، فَإِنْ ‌لَمْ ‌تَسْتَطِعْ فَعَلَى جَنْبٍ» ^([1])۔

"مجھے بواسیر (پائلز) کی بیماری تھی، تو میں نے نبی کریم ﷺ سے نماز کے بارے میں پوچھا۔ آپ ﷺ نے فرمایا: "نماز کھڑے ہو کر پڑھو، اگر اس کی طاقت نہ ہو تو بیٹھ کر، اور اگر اس کی بھی طاقت نہ ہو تو پہلو کے بل (لیٹ کر) پڑھو۔'”

اس حدیث سے حاصل ہونے والا شرعی حکم یہ ہےکہ:

اگر کوئی شخص قیام پر قادر ہو تو اس کے لئے قیام فرض ہے۔ اگر قیام کی طاقت نہ ہو تو بیٹھ کر نماز پڑھ سکتا ہے۔اگر بیٹھنے کی بھی طاقت نہ ہو تو پہلو کے بل لیٹ کر نماز پڑھ سکتا ہے۔یہ معذور افراد کے لئے نماز کی رعایت (تخفیف) کی بنیاد ہے، اور اس پر امت کا اجماع ہے۔

ابن قدامہ مقدسی رحمہ اللہ فرماتے ہیں:

” أجمع أهل العلم على أن من لا يطيق القيام له أن يصلي جالساً ” ^([2]).

"اہلِ علم کا اس بات پر اجماع ہے کہ جو شخص قیام (نماز میں کھڑا ہونا) کی طاقت نہیں رکھتا، وہ بیٹھ کر نماز پڑھ سکتا ہے۔”

اسى طرح امام نووی رحمہ اللہ فرماتے ہیں:

” أجمعت الأمة على أن من عجز عن القيام في الفريضة صلاها قاعداً ولا إعادة عليه، قال أصحابنا: ولا ينقص ثوابه عن ثوابه في حال القيام؛ لأنه معذور، وقد ثبت في صحيح البخاري أن رسول الله ﷺ قال: «إِذَا مَرِضَ الْعَبْدُ أَوْ سَافَرَ كُتِبَ لَهُ مَا كَانَ يَعْمَلُ مُقِيمًا صَحِيحًا^([3]) » ^([4])۔

"امت کا اس بات پر اجماع ہے کہ جو شخص فرض نماز میں قیام سے عاجز ہو، وہ اُسے بیٹھ کر ادا کرے گا اور اس پر نماز کو دوبارہ پڑھنا لازم نہیں ہوگا۔ ہمارے علما ء(شافعیہ) نے کہا ہے کہ ایسے شخص کا ثواب قیام کی حالت والے شخص کے برابر ہی ہوگا، کیونکہ وہ معذور ہے۔ اور صحیح بخاری میں ثابت ہے کہ رسول اللہ ﷺ نے فرمایا(جب بندہ بیمار ہو جائے یا سفر میں ہو تو اس کے لئے وہی عمل لکھا جاتا ہے جو وہ صحت و اقامت کی حالت میں کیا کرتا تھا)”۔

علامہ شوکانی فرماتے ہیں:

” وحديث عمران يدل على أنه يجوز لمن حصل له عذر لا يستطيع معه القيام أن يصلي قاعداً ولمن حصل له عذر لا يستطيع معه القعود أن يصلي على جنبه” ⁽^[5]⁾ .

"عمران بن حصین رضى الله عنه کی حدیث اس بات پر دلالت کرتی ہے کہ جس شخص کو ایسا عذر لاحق ہو کہ وہ قیام نہیں کر سکتا، تو وہ بیٹھ کر نماز پڑھ سکتا ہے۔ اور جس کو بیٹھنے کی بھی طاقت نہ ہو، وہ پہلو کے بل لیٹ کرنماز ادا کرے۔”

شیخ الاسلام ابن تیمیہ رحمہ اللہ فرماتے ہیں:

” وَقَدْ اتَّفَقَ الْمُسْلِمُونَ عَلَى أَنَّ الْمُصَلِّيَ إذَا عَجَزَ عَنْ بَعْضِ وَاجِبَاتِهَا كَالْقِيَامِ أَوْ الْقِرَاءَةِ أَوْ الرُّكُوعِ أَوْ السُّجُودِ أَوْ سَتْرِ الْعَوْرَةِ أَوْ اسْتِقْبَالِ الْقِبْلَةِ أَوْ غَيْرِ ذَلِكَ سَقَطَ عَنْهُ مَا عَجَزَ عَنْهُ "^([6]).

"تمام مسلمان اس بات پر متفق ہیں کہ اگر کوئی نمازی نماز کے بعض واجبات مثلاً قیام، قراءت، رکوع، سجدہ، سترِ عورت، قبلہ رخ ہونا یا اس جیسی کسی چیز پر قادر نہ ہو تو اس سے وہ ساقط ہو جاتی ہے جس پر وہ قادر نہیں۔”

ان اقوال کا خلاصہ اور نتیجہ یہ ہےکہ:

اگر کوئی شخص فرض نماز میں بیٹھ کر نماز پڑھتا ہے حالانکہ وہ کھڑے ہونے کی قدرت رکھتا ہے تو اس کی نماز باطل ہے۔

جو شخص کھڑے ہونے سے معذور ہو، لیکن رکوع اور سجدہ اپنى اصل حالت پر کرسکتا ہو تو اسے رکوع و سجدہ کو اس کی اصل ہیئت کے مطابق ادا کرنا واجب ہے۔

اور اگر کوئی شخص قیام پر قادر ہو لیکن رکوع و سجدہ میں اسے مشقت ہو، تو وہ کھڑے ہو کر نماز شروع کرے، اور رکوع و سجدہ کے وقت کرسی پر بیٹھ جائے، اور سجدہ کو رکوع سے زیادہ جھک کر ادا کرے۔

یہاں ایک اہم فقہی اصول کو سمجھنا بہت ضرورى ہے:

یاد رہے کہ واجب نماز کا جوعمل ممکن ہووہ ضرور ادا کیا جائے گا۔ مثلا: اگر قیام ممکن ہے تو قیام کرےگا،البتہ جو شخص رکوع و سجدہ کرنے سے معذور ہو اسے چاہیئے کہ وہ رکوع و سجود بیٹھ کر کرے ،لیکن اگرقیام ممکن ہوتو وہ قیام کرے اور اشارے سے سجدہ و رکوع کرے یا بیٹھ کر ادا کرے۔

ابن قدامہ رحمہ اللہ فرماتے ہیں:

” ومن قدر على القيام وعجز عن الركوع أو السجود: لم يسقط عنه القيام، ويصلي قائماً فيومئ بالركوع ، ثم يجلس فيومئ بالسجود، وبهذا قال الشافعي … لقول الله تعالى: وَقُومُواْ لِلَّهِ قَٰنِتِينَ ٢٣٨ البَقَرَةِ : ، وقول النبي ﷺ: «صَلِّ قَائِمًا» ^([7])؛ ولأن القيام ركن لمن قدر عليه، فلزمه الإتيان به كالقراءة، والعجز عن غيره لا يقتضي سقوطه كما لو عجز عن القراءة ” ^([8]).

"اور جو شخص قیام پر قادر ہو مگر رکوع یا سجدہ سے عاجز ہو، تو اس کے حق میں قیام ساقط نہیں ہوگا۔
وہ شخص کھڑے ہو کر نماز پڑھے گا اور رکوع کے لئے اشارہ کرے گا، پھر بیٹھ جائے گا اور سجدے کے لئے اشارہ کرے گا۔اسی رائے کو امام شافعی رحمہ اللہ نے اختیار کیا ہے…اس کی دلیل اللہ تعالیٰ کافرمان ہے:
وَقُومُواْ لِلَّهِ قَٰنِتِينَ ٢٣٨ "اور اللہ کے سامنے عاجزی کے ساتھ کھڑے ہو جاؤ”۔ اور رسول اللہ ﷺ کا فرمان ہے: "نماز کھڑے ہو کر ادا کرو”۔

کیونکہ قیام ان لوگوں کے لئے رکن ہے جو اس کی طاقت رکھتے ہوں، لہٰذا اس کا ادا کرنا اس پر لازم ہوگا، جس طرح کہ قراءت (تلاوت) بھی لازم ہے۔ اور اگر وہ شخص دوسرے رکن (مثلاً رکوع یا سجدہ) پر قادر نہ ہو، تو یہ اس بات کا تقاضا نہیں کہ قیام بھی ساقط ہو جائے گا جس طرح اگر کوئی شخص تلاوت پر قادر نہ ہو تو قیام ساقط نہیں ہوتا۔”

اگر کرسى پر نماز ادا کى جارہى ہو تو تو کرسى کے پاؤں صف کے برابر ہونے چاہیئے نہ کہ صف سے نکلے ہوئے پیچھے کى طرف۔ کیونکہ کھڑے ہوکر نماز صف ہى میں ادا کى جاتى ہے۔جہاں تمام مصلیوں کے قدم ایک ترتیب سے ہوتے ہیں۔

اگر کوئی شخص پوری نماز میں کرسی پر بیٹھا رہے گا، تو اسے صف میں اپنی کرسی کو یوں رکھنا چاہیئے کہ اس کے بیٹھنے کا مقام صف کے برابر ہو نہ آگے نہ پیچھے۔

اگر کوئی شخص کھڑے ہو کر نماز شروع کرے گا، لیکن رکوع و سجدے کے وقت کرسی پر بیٹھے گا، تو اس صورت میں صف بندی کا اعتبار قیام کے وقت کے مقام سے کیا جائے گا، یعنی وہ شخص صف کے برابر کھڑا ہو، اور اس کی کرسی صف کے پیچھے ہو۔

اس صورت میں کرسی کا کچھ حصہ صف کے پیچھے چلا جائے گا، لہٰذا کرسی کو اس طرح رکھنا چاہیئے کہ پیچھے نماز پڑھنے والے افراد کو تکلیف نہ ہو۔^([9])۔

ان تمام باتوں کا خلاصہ یہ کہ اگر قیام ممکن نہ ہو تو کرسى پر بیٹھ کر نماز ادا کى جاسکتى ہے۔ البتہ اگر رکوع وسجود میں کوئى پریشانى نہ ہوتو اسے ویسے ہى اصل حالت میں ادا کرنا واجب ہوگا۔ کرسى پر نماز پڑھنے کى صورت میں کرسى کے قدم صفوں کے برابر ہونا چاہیئے صفوں سے پیچھے نہ ہو۔

واللہ اعلم

([1]) صحیح بخارى، حديث نمبر (1117)۔

([2]) المغنی، 1/443۔

([3]) صحیح بخارى، حديث نمبر (2996)۔

([4]) المجموع، 4/226۔

([5])نیل الأوطار، 3/243۔

([6])مجموع الفتاوى، 8/437۔

([7]) صحیح بخارى، حديث نمبر (1117)۔

([8]) المغني، 1/444۔

([9]) تفصیل کے لئے دیکھیں: الموسوعۃ الفقہیۃ الكويتيه، 6/21۔

اجابة بواسطة:

علمی کمیٹی

مضمون کا اشتراک کریں

متعلقہ فتوے